“Air India” awiakompaniýasynyň “Boeing 787-8 Dreamliner” kysymly uçarynyň Hindistanyň günbataryndaky Ahmadabad şäherinde ýykylmagy netijesinde ölenleriň sany 274 adama ýetdi diýip, NDTV neşiri habar berýär.
Uçaryň bortunda jemi 242 adam, ýagny 230 ýolagçy we 12 ekipaž agzasy bardy. Olaryň arasyndan diňe bir adam, 40 ýaşly britan raýaty diri galdy. Mundan başga-da, uçaryň gaçan pursadynda ýerde bolan 33 adam heläk boldy.
12-nji iýunda London ugry boýunça uçmaly “Air India” awiakompaniýasynyň uçary Ahmadabad şäherinden asmana galanyndan kän wagt geçmänkä heläkçilige uçrady.
Hindistanyň raýat awiasiýasy boýunça baş müdirligi ekipažyň betbagtçylykdan öň howsala signallaryny (SOS) berip ýetişendigini, ýöne soňundan aragatnaşygyň kesilendigini mälim etdi.
Heläkçiligiň sebäpleri heniz anyklanmady.